भारतमा शल्यक्रिया गरेर आलै घाउ घर फर्केका बिरामी गड्डाचौकीमा १२ घन्टा अलपत्र


हरेकपल March 25, 2020

काठमाडौं । विभिन्न कामको सिलसिलामा भारतमा रहेका नेपाली स्वदेश फर्किने क्रम रोकिएको छैन । तर, सरकारले नाकामा रोक्दा काखमा शिशु च्यापेका सुत्केरीदेखि भर्खर शल्यक्रिया गरेका बिरामी दसगजा क्षेत्रमा घन्टौँ छटपटाउन बाध्य भए ।

भारतको सीतारगन्जस्थित पद्मा अस्पतालमा पित्तथैलीको शल्यक्रिया गरेर फर्किएका महेन्द्रनगर–४ का रामबहादुर खड्का ९बायाँ० र पाठेघरको शल्यक्रिया गरेर फर्किएकी वेदकोट–२ सिसैयाकी ठगुदेवी सार्की मंगलबार गड्डाचौकी नाकापारि दसगजा क्षेत्रमा । सीमामा १२ घन्टा अलपत्र परेपछि साँझ घर फर्किन पाएका छन् ।
कञ्चनपुरको गड्डाचौकी नाकामा सोमबार मिर्मिरेमै आइपुगेका बिरामी १२ घन्टासम्म अलपत्र परे । मंगलबार बिहान भिडमा ६० वर्षीय बर्मा जोशी पनि भेटिए । पेट दुख्ने समस्या भएपछि भारतको सीतारगन्जस्थित पद्मा अस्पताल पुगेकी टीकापुर नगरपालिका–२ कैलालीकी उनको पित्तथैलीको अपरेसन भएको थियो । अस्पतालले अपरेसनको सात दिनमा सोमबार राति डिस्चार्ज गरिदिएपछि उनी आलै घाउ घर फर्किएका थिए । तर, नाका आइपुग्दा रोकिएपछि वृद्ध रातभर अलपत्र परे । उनी चउरमा पेट समाएर छटपटाइरहेका थिए ।

जोशीसँगै नाकामा रोकिँदा चउरमा छटपटाइरहेका थिए ठगु सार्की र राम खड्का पनि । कञ्चनपुरको बेदकोट नगरपालिका–६, सिसैयाकी ४५ वर्षीया सार्कीको पनि पदमा अस्पतालमै सात दिनअघि पाठेघरको अपरेसन भएको थियो । कञ्चनपुरकै भीमदत्त नगरपालिका–४, महेन्द्रनगरका ६१ वर्षीय राम खड्काको भने ८ दिनअघि पित्तथैलीको अपरेसन भएको थियो ।

भारतमा समेत लकडाउन भएकाले सोमबार राति अस्पतालले नै सवारीसाधन व्यवस्था गरेर गड्डाचौकी ल्याएर छाडिदिएको थियो । त्यहाँ १८ बिरामी र कुरुवासमेत गरी ३९ नेपाली थिए । बिरामी हुँदा देशमा उपचार नपाएर विदेश जानुपरेको, तर उपचार गरेर फर्किँदा देशमै प्रवेश नपाएको भन्दै कुरुवाहरूले विरोध गरेका थिए । १२ घन्टा अलपत्र परेपछि मंगलबार साँझ मात्रै उनीहरूलाई प्रवेश दिइएको छ ।

उता, स्वदेश फर्किँदै गरेका तीन सय नेपालीलाई भारतीय प्रहरीले सोमबार राति १ बजेदेखि मंगलबार दिनभर वनबासा जंगलमा थुन्यो । काखमा बालबच्चा च्यापेका सुत्केरीसमेत रातभर जंगलमै रोकिए । मंगलबार अपराह्न भने भारतीय प्रहरीले उनीहरूलाई लाठीले हान्दै वनबासाबाट नेपालतर्फ महाकाली नगरपालिकाको जंगलतिर धपाइदिएको थियो । साँझ सशस्त्र प्रहरीले सबैको उद्धार गरी गड्डाचौकी ल्याएर स्वास्थ्य जाँचपछि घर पठाएको छ ।

भारतीय प्रहरीले १२ घन्टा थुनेपछि लाठीले हानेर लखेटेको बझाङको थलरा गाउँपालिका–१ का हर्कराज भट्टले बताए । उनी भारतको फरिदवाद होटेलमा मजदुरी गर्थे । ‘हामीलाई भारतीय प्रहरीले रातभरि जंगलमा रोक्यो । भोकभोकै बस्यौँ । दिउँसो भने नेपाल सरकारको आदेश दिए छाडिदिन्छौँ भन्दै यताउता डुलायो,’ उनले भने, ‘दिउँसो १२ बजे एक्कासि लाठीचार्ज गर्दै धपायो ।’ गड्डाचौकीबाट भित्रिएका सबैलाई हेल्थ डेस्कमा स्वास्थ्य जाँच गरेपछि प्रशासनले गाडी व्यवस्था गरिदिएर सेल्फ क्वारेन्टाइनमा बस्ने प्रतिबद्धतासहित घर पठाएको छ ।
पूर्वसूचनाविना सरकारले लकडाउन घोषणा गरेपछि ५० डोल्पाली नेपालगन्जमा अलपत्र परेका छन् । अलपत्र पर्नेमा ८० वर्षीया वृद्ध र १३ दिनकी सुत्केरीदेखि विद्यार्थीसम्म छन् । अधिकांश उपल्लो डोल्पाका छन् । जहाजको टिकट लिएर बसेकाहरूसमेत अलपत्र परेका छन् । आफूहरू राँझा विमानस्थलनजिक दुईवटा होटेल लिएर बसेको काइके गाउँपालिकाका जगबहादुर बुढामगरले बताए । थप एकसाता बस्नुपरे खर्च नपुग्ने गुनासो गरे ।

टिकट लिए पनि जहाज नउडेपछि अलपत्र परेको काइके गाउँपालिकाका वडाध्यक्ष राजु रोकायले बताए । दिल्लीबाट ९३ हजार ट्याक्सी भाडा तिरेर आएका तीनसहित २३ जनालाई पाँच घन्टा नाकामा रोकेपछि स्वास्थ्य जाँच गरेर क्वारेन्टाइनमा युनाइटेड अरब इमिरेट्स ९युएई०को दुबईबाट दिल्ली हुँदै आएका तीनसहित २३ जनालाई सिरहाको माडर खैरटो नाकामा पाँच घन्टा रोकेर मात्रै प्रवेश दिइएको छ । २० जना बैंग्लोर, अमदावाद र राजस्थानबाट आएका थिए ।

बिहान ७ बजेतिर आइपुगेका उनीहरूलाई साढे ११ बजे स्वास्थ्य परीक्षण गरेर नाका भिœयाइएको थियो । सबैलाई सीमानजिकै ब्रजमोहन झब्बुराम जनता माध्यमिक विद्यालयमा क्वारेन्टाइनमा राखिएको छ । दुबईबाट आएकाहरूले दिल्लीदेखि नाकासम्म आउँदा ९३ हजार ट्याक्सी भाडा तिरेको बताए । भिसा सकिएपछि दुबईबाट भने कम्पनीले नै टिकट काटेर पठाइदिएको उनीहरूले बताए । उनीहरू सिरहा, खोटाङ र झापाका हुन् ।

त्यस्तै, बैंग्लोरबाट आएका चारजना नर्सिङका विद्यार्थीलाई पटनामा स्क्रिनिङ गरेर नेपाल आउन दिएको थियो । पटना रेल्वेमा स्क्रिनिङ गरेपछि उनीहरूको हातमा स्टाम्प लगाइएको छ । उनीहरू दुईजना मोरङ, उर्लाबारीका, अन्य दुई झापा सतासीधाम र पाँचथरका छन् । नयाँपत्रिका दैनिकमा खबर छ ।