ओम्‍नीले नेपालमा भित्र्याएकै ब्रान्डको आरडीटी किट प्रयोगमा भारतमा लाग्यो रोक


हरेकपल April 28, 2020

नयाँदिल्ली । भारतले चिनियाँ कम्पनी वन्डफो ब्राण्डका आरडीटी किटबाट परीक्षणको नतिजा विश्वसनीय नभएको भन्दै प्रयोगमा रोक लगाउने निर्णय गरेको छ ।

ओम्नी बिजनेस कर्पोरेट इन्टरनेसनल (ओबीसीआई) ले चीनबाट ल्याएको ग्वान्जाउ वन्डफो बायोटेक कम्पनीद्वारा उत्पादित ‘वन्डफो’ ब्राण्डको दु्रत परीक्षण किट (आरडीटी) खरिदका लागि नेपालका स्वास्थ्यसम्बद्ध राष्ट्रिय एवं अन्तर्राष्ट्रिय गैरसरकारी संस्थाहरुलाई दबाब दिइरहेका बेला यता भारतले भने उक्त ब्राण्डको आरडीटी किटको प्रयोगमा रोक लगाएको छ।

तर, भारतीय आर्युविज्ञान अनुसन्धान परिषद् (आईसीएमआर) ले वन्डफो ब्राण्डका आरडीटी परीक्षणको नतिजा विश्वसनीय नभएको भन्दै प्रयोगमा रोक लगाउने निर्णय गरेको हो।
आईसीएमआरले ग्वान्जाउ वन्डफो बायोटेक र जुहाई लिब्जन ब्राण्डका आरडीटी किटको नतिजाप्रति विभिन्न राज्यहरुमा प्रश्न उठेपछि तिनीहरुको गुणस्तर परीक्षण गरेको थियो।

उक्त परीक्षणको नतिजा विश्वसनीय नपाएपछि तिनको प्रयोग तत्काल बन्द गर्न र आपूर्तिकर्तालाई तत्काल फिर्ता गर्न आईसीएमआरले सूचना जारी गरेको छ। त्यसैगरी उसले कोभिड १९ को परीक्षणका लागि पीसीआर विधि नै भरपर्दो र उत्तम भएको समेत जनाएको छ। कान्तिपुर दैनिकमा खबर छ ।