श्रीगणेशायनमः ।। आज विक्रम संवत् २०७७ साल ज्येष्ठ महिनाको १३ गते तदनुसार ईशवीय सन् २०२० अन्तर्गत मे महिनाको २६ तारिख, मंगलवार हो । सृष्टिदेखि हालसम्म १,९५,५८,८५१२१(एक अर्व, पञ्चानब्बे करोड अन्नठाउन्न लाख पचासीहजार १२१) वर्ष व्यतीत भइसकेका छन् । कलिकालको ५१२१ औँ वर्षअन्तर्गत श्रीशालिवाहनीय शाके १९४२, तथा नेपाल संवत् ११४० अन्तर्गत प्रमादी नामको संवत्सर चलिरहेको छ ।
सूर्य उत्तरायणमा छन् । ग्रीष्म ऋतुअन्तर्गत ज्येष्ठशुक्लपक्षको चतुर्थी तिथि राति ११।३६ बजेसम्म रहनेछ । यो महिनाका देवता त्रिविक्रम र मासदेवी पद्माक्षी हुन् । सूर्य वृष राशिमा र बृहस्पति मकर राशिमा रहेका छन् । आद्र्रा नक्षत्र बिहान ६।१७ बजेसम्म रहनेछ । यसैगरी गण्ड योग र वणिज करण रहेका छन् । आज सूर्योदय बिहान ५।१२ मा छ भने सूर्यास्त बेलुका ६।५१ बजे हुनेछ । चन्द्रमा आज मिथुन राशिमा छन् ।
आज मंगलचौथीव्रत परेको छ । मंगलवार चतुर्थी तिथि परेको दिनलाई मंगलचौथी भनिन्छ । चतुर्थी गणेशजीको प्रिय दिन हो । यसैगरी मंगवार पनि विशेष गरी गणेशजीको नै उपासना हुने गर्दछ । गणेशजी प्रसन्न हुने तिथि एवं वारको संयोग वेला वेलामा पर्ने गर्दछ । यस अवसरमा मंगल चौथीको व्रत आरम्भका साथै समापन पनि शुभ मानिन्छ ।
गणेश पुराणमा गणेशजीको विशेष महिमा बताइएको छ । पार्वतीनन्दन गणेशजी समस्त लोकका मंगलकर्ता हुनुहुन्छ । यसैले आज विशेष उपचारले पूजाका साथै लड्डु एवं दुवो को अर्पण आज फलदायी रहन्छ । अभीष्ट मनोकामना सिद्धिका साथै मंगल ग्रहजन्य दोष निवृत्तिका निम्ति पनि मंगल चौथीको व्रत लाभदायी रहने गर्दछ । यसैले आज गणेशस्तोत्रपाठ, गणेशजीको ॐ गं गणपतये नमः भन्ने मन्त्र जपका साथै गणेशअथर्वशीर्ष पाठ पनि शुभ फलदायी रहने गर्दछ ।
