आङ सान सुकीलाई तत्काल रिहा गरेर निर्वाचित सरकार पुनर्स्थापना गर्न कांग्रेस सभापतिको आग्रह


हरेकपल February 1, 2021

म्यानमारमा सेनाले कु गरेर नेतृ आङ सान सुकीलाई गिरफ्तार गरेकोमा नेपाली कांग्रेसका सभापति शेरबहादुर देउवाले त्यसको विरोध गरेका छन् । देउवाले सुकीलाई तत्काल रिहा गर्न र निर्वाचित सरकार पुनर्स्थापना गर्न म्यानमारको सेनालाई आग्रह गरेका छन् ।

म्यानमारको सेनाले सोमबार बिहान म्यानमारका राष्ट्रपति वुइन मिन्ट, नेतृ आङ सान सुचीलगायतका शीर्ष राजनीतिक दल र सरकारी अधिकारीहरुलाई गिरफ्तार गरेको छ ।

सोमबार ट्वीट गर्दै देउवाले लेखेका छन् , ‘आङ सान सुकीलाई तत्काल रिहा गर्नुका साथै निर्वाचित सरकार पुनर्स्थापना गर्न नेपाली कांग्रेस म्यानमारको सेनालाई आग्रह गर्दछ ।’

सेनाले सैन्य कू गरी निर्वाचित सरकार अपदस्थ गरेको छ । निर्वाचनपछिको पहिलो संसद् बैठक बस्‍नुअघि सोमबार बिहान सेनाले सुकीसहितका नेताहरुलाई गिरफ्तार गरेको हो ।

सरकार असफल भएको आरोप लगाउँदै एक वर्षका संकटकाल लगाइएको म्यानमारको सेनाले जनाएको छ । यसअघि नोभेम्बरमा भएको निर्वाचनमा सेना समर्थित दल पराजित भएको थियो । सेनाले निर्वाचनमा धाँधली भएको आरोप लगाएको थियो ।