भूकम्प प्रभावित अधियामा जग्गा कमाउँदै


हरेकपल January 8, 2020

रसुवा २३ पुस । भूकम्पका कारण विस्थापित भई खाल्टे बगरमा बसोवास गरेका साविक हाकु गोगनेवासी अधियामा जग्गा कमाउन थालेका छन् । विस्थापितमध्येका परमासिंह तामाङले जीविकोपार्जनका लागि धौधौ परेपछि बेत्रावती बोगटीटारका बासिन्दाको स्वामित्वमा रहेको जमिन खनजोत गर्न थालेका बताउनुभयो ।

खाल्टे बगरमा बस्ने करिब २०० घर परिवारको बसोवास खोलाबगरमा भएको र अधिकांशले कृषिउपज आधा-आधा दिने लिने शर्तमा बाली रोपण गर्न पाइएका कारण बिहान बेलुका छाक टार्न केही सहजता आएको भूकम्प प्रभावित बासिन्दाले बताएका छन् । कोही अर्काको खेतबारीमा काम गर्न खेतला जाने, कोही अन्य मजदूरीसमेतका विविध पेशा गरी खाद्यान्नको जोहो गरे पनि उत्तरगया गाउँपालिका–५ मा अवस्थित त्रिशूली नदीको बगरमा बस्ती रहेको, जस्ताको टहरामा बास, जाडो याममा चिसो, गर्मीयाममा धुलो, वर्षामा खोला बाढी आउने डरजस्ता समस्या भोग्नुपरेकामा प्रभावितहरुको दुखेसो गरेका छन् ।

अहिले जाडो महिनाको याममा जस्ताको ओसले चिसो हुँदा वृद्धवृद्धा र बालबालिकालाई थप समस्या भइरहेको तामाङले जानकारी दिनुभयो । यस्तै बगरमा बस्दा अनेकौँ पीडा भए पनि बालबालिकाको पठनपाठनप्रति भूकम्पबाट विस्थापित परिवारले खुशी मानेका छन् । भूकम्प अगाडि हाकुको गोगनेमा पढाइ राम्रो नहुँदा बालबालिकालाई अन्यत्र विद्यालय पठाउनुपर्ने अवस्था थियो अहिले बेत्रावती क्षेत्रमा पठनपाठनको राम्रो व्यवस्थाले पढाइको गुणस्तर राम्रो, चनाखोपन, शारीरिक व्यायामका लागि खेलकूदजस्ता विविध गतिविधिले ती बालबालिकाको मनोबल उच्च हुँदै गएको बताइएको छ ।